thesinge.com
t Dialect verandert mit de tied

Meertmoand is al joaren dialectmoand, en doar hem we van veumirreg aandacht aan besteed. Is t Grunnings van vrouger nog t Grunnings van distied?
Wie begunn mit een laid van Ede Staal, of is t Ede Stoal? 'Grunnings veur begunners.' Wél ken zingn, zingt mor mit. En ik mot zeggen, dat gait meroakel.
Helpt klòkje of klokje t maist veur de kol'
n Potje het broek vol da's aans wat as vòl
Dit is veur begunners he, benje d'r nog bie?

'k Heb oet t buuswoordenboukje van Siemon Reker wat woorden opzöcht. Zoln de bezuikers dizze woorden nog kennen, mor veuraal, worn ze nog bruukt. Een brannekkel blieft een brannekkel. Mor wel het t distied nog over n gebèlskop aans ze een masker bedouln? Aans ik t over honton heb waitn de bezuikers persies woar ik t over heb. En summege hem net aans ik, vrouger ook wel mit dorreltjes speult. En elk is wel es lebait. Snakt noar oam, blier om de kop of kiekt wat hoamel oet.

Het is tied veur n aner laidje van Ede. 't Zel weer veujoar worn.'
t Zel weer veujoar worn
t Zel weer veujoar worn
Ik roek t aan de lucht
En d'eerste holtdoef vlugt
De winter was laang
En ik was baang
Dat t noeit weer veujoar worn zol
Mor t komt altied wel goud

De bontmuts, bivak, sjaals
En hansen goan weer ien de kaast
De vraauw die hoalt n klaid ter oet
En kikt of heur t nog paast
Want t zel weer veujoar worn

De tied dat vraauwluu een klaid aanharn en wie onze bosschoppen ien n puut deedn is veurbie. Klaid is n jurk worn, puut het ploats mokt veur een taske en stevels hem we nait meer aan. Nee, dat ben leerzen. Een spidderbred het ploats mokt veur een spatbord. En souskes eetn we ook nait meer. Wél pinda's. En aansje teegn n kiend zeggen, kenst wel eem goan zuzoien, waitn ze echt nait meer woar wie t over hem. Net zo min aans dat we zeggen, hest zin ien wat slik? Mor zeg nou zulf. Wait ie nog wat een snèl, brùg of n sloatje is?

Ede zingt r al van. 'Wat moakt het oet.'
t Dialect is nait van stain, t verandert mit de tied
Wat moakt t oet, of t nou onkruud is of roet
Elke streek zien aigen variant

Woar ik geboren ben, woar ik de mensen ken
Dat is mien Grunneger laand
Woar ie de woorden heurn, dij joen gedachten kleurn
De ziel van elk verhoal
Joen aigen toal

Ede is op 22 juli 1986 oet tied komm. Van veumirreg, sikkom 31 joar loader, hem we nog genootn van zien laidjes. En, zol Ede oeit dreumt hem, dat zien 't Het nog noeit zo donker west' as striedlaid zongen zol worn deur Freek de Jonge en Grunneger artiesten?

Tot aander week.
Tot kiek.


Agenda
augustus 2020
Ma Di Wo Do Vr Za Zo
          1 2
3 4 5 6 7
8
9
10 11 12 13 14 15 16
17 18 19 20 21 22 23
24 25 26 27 28 29 30
31            
september 2020
Ma Di Wo Do Vr Za Zo
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30        
Binnenkort in Thesinge
14 augustus 2020
Zummerspeulen 2020

Op 13 en 14 augustus voor 4 t/m 12 jarigen. Geef je op voor 15 juni.

Meer informatie op www.thesinge.com/zummerspeulen

Foto van de maand
Koos-juni-2020-web.jpg

privacy

contact

facebook

nieuws

agenda